ദേഷ്യം

ഭ്രാന്ത് പൂക്കുന്ന നേരങ്ങളിൽ,
എന്റെ ശിഖരങ്ങൾ
കാറ്റിനോടെന്ന പോലെ
നിന്നോട് കയർക്കാറുണ്ട്.
കാറും കോളുമൊഴിയുന്ന
വസന്തകാലത്ത് നാമെന്തിന്,
കഴിഞ്ഞുപോയ വേനലിന്റെ
നഷ്ടങ്ങളെയോർത്ത്,
ഇലപൊഴിക്കണം..!

സർപ്പദോഷം

കിണറിന്റെ ആഴത്തെ ഭയന്ന്
മുകളിലായി അവളൊരു കമ്പി വേലി കെട്ടി,
ഗ്യാസ് അടുപ്പിന്റെ ചൂടിനെ ഭയന്ന്,
അവളൊരു ഇൻഡക്ഷൻ സ്റ്റൗ വാങ്ങിച്ചു.
സിലിംഗ് ഫാനിന്റെ ഉയരത്തെ പേടിച്ചൊരു,
പെടസ്റ്റൽ ഫാൻ ഏർപ്പാടാക്കി.
വിഷമേറിയ പാമ്പിൽ നിന്ന്
രക്ഷക്കായ് വീട്ടിൽ ഒരു പറ്റം
കീരികളെ വളർത്തണം,
ഇനിയും പേടി കൂടാതെ ഉറങ്ങാനവൾ,
എന്തൊക്കെ ഒരുക്കണം.!