പുസ്തകവും പേനയും

പുസ്തകമിപ്പോഴും
വരികള്‍ക്കിടയില്‍ അക്ഷരങ്ങള്‍
എഴുതിചേര്‍ത്തു കടന്നുപോയ
പേനയെ
ഓര്‍ത്തെടുത്തു
നെടുവീര്‍പ്പിടുന്നത് കാണാം.
പേനയെന്നും .. പലനിറങ്ങളില്‍
മഷി നിറച്ചു, ഒരുപാട്
പുസ്തകങ്ങളെ തേടുന്ന
വേശ്യയായിരിന്നു..

മുഖത്തു ചായം തേച്ച് കിടപ്പറയില്‍
നിഴല്‍രൂപങ്ങള്‍ പരസ്പരം
സംസാരിച്ചു..
വശ്യതയുടെ വീര്‍പുമുട്ടലുകളില്‍,
ഭൂതകാലങ്ങള്‍ ശവ പറമ്പിലെന്നപോല്‍
എരിഞ്ഞടങ്ങി..
കത്തി വേഷം കെട്ടിയവര്‍
പകല്‍ വെളിച്ചങ്ങളില്‍
കൃഷ്ണനും രാധയുമായി..

എളുപ്പവഴി

ഒരു കറക്കി കുത്ത്  നടത്തണം
പഠിച്ചതും അറിഞ്ഞതും മറന്നു
തുടങ്ങുമ്പോള്‍, ഒരു കണ്ണിറുക്കി അടച്ചു..
മറ്റേകണ്ണാരും കാണാതെ തുറന്നു.
സ്വയം പറ്റിച്ചു
ജീവിതം തിരഞ്ഞെടുക്കാന്‍ എളുപ്പവഴി..
കൈവെള്ള നിവര്‍ത്തിവെച്ച്
കൂര്‍ത്തോരായുധം കൊണ്ട്
ഈ വരയും കുറിയും മായ്ച്ചു കളഞ്ഞാല്‍
കൈനോട്ടക്കാരനെയും പറ്റിക്കാം...
ഒടുവിലെല്ലാം  പിഴച്ചു പോയാല്‍
പഴിക്കാന്‍ വിധിയുണ്ടല്ലോ..

ഒപ്പം ചേര്‍ന്ന്  നടക്കുന്നതു-
കണ്ടപ്പോള്‍ സംശയത്തോടെ
അവന്‍ ചോദിച്ചു
നിനക്ക് പുസ്തകങ്ങളെ ഇഷ്ടമാണോ?
അവള്‍ പതുക്കെ പറഞ്ഞു
അതെ..
നക്ഷത്രങ്ങളെ?
അതെ..
നാട്ടിന്‍പുറത്തെ
തെച്ചിയെയും, കാറ്റാടി മരങ്ങളെയും ?
അതെ.. അതെ..
എന്നെ?
ദൂരം ഒരുപാടായല്ലോ..
അവള്‍ ചിരിച്ചു കൊണ്ട് പറഞ്ഞു.
പെട്ടെന്ന് എങ്ങു നിന്നോ
ഒരു വാഹനം എതിരെ
കടന്നു പോയി,
കൈ വീശിയെറിഞ്ഞു
ഒപ്പം അവളും.
പൊടിയും പുകയും ചേര്‍ന്ന
ആ ഒറ്റ തെരുവില്‍ നിന്ന്
അകലെയാവുന്ന വാഹനത്തെ
നോക്കി അവന്‍ ഉറക്കെ
വിളിച്ചു ചോദിച്ചു..
നിനക്ക് പുസ്തകങ്ങളെ
ഇഷ്ടമായിരുന്നോ?
അല്ല..
 നക്ഷത്രങ്ങളെ?
അല്ല..
നാട്ടിന്‍പുറത്തെ
തെച്ചിയെയും, കാറ്റാടി മരങ്ങളെയും ?
അല്ല.. അല്ല..
ഒരു ചോദ്യം ചിരിയിലൊതുക്കി 
അവന്‍ യാത്ര തുടര്‍ന്നു..

നിള

ഈ അപ്പൂപ്പന്  ഒന്നും അറിയില്ല...
നിള എന്നത്
സ്കൂളീന്ന്  ടൂറു പോയപ്പോ കണ്ട
മാനം  മുട്ടെ ഉയര്‍ന്നു നില്‍ക്കുന്ന
ഒരു കോണ്‍ക്രീറ്റ്
കെട്ടിടത്തിന്റെ പേരാണപ്പൂപ്പാ..